بتعرفوا.. أنا خلقت بحيفا, يعني معاي هوية زرقة!
خلقت بين البحر الأزرق والجبل الأخضر.. تقريبا بالنص.. تحت غيوم سما عروس البحر حيفا..
يمكن مش بالنص, مش عارفي احدد..! ومين قال إني لازم احدد؟!!
لمن كنت صغيرة كانوا يقولوا لي إننا فلسطينية! لمن كبرت انتبهت انو بهويتي مكتوب إني اسرائيلية!!!
لمن كنت صغيرة كانوا يقولوا لي "بس تكبري راح تتجوزي فارس أحلامك"!! لمن كبرت فهمت اني مغرومة بصبية!! وفهمت اني مش فاهمي شي!! مش فاهمي شو هيي القضية!!!

أنا عايشة بدولة الناس الي بتحكي فيها لغتي بسموها مجموعة الأقلية!
أنا عايشة بدولة الي فيها كتير مرات بلاقي حالي ممنوعة عن التعبير.. وبالشارع بعيونن بنادوني عربية, عربية!!
كتير مرات بلاقي حالي عم بحد من حرية قلمي تيكتب بلغة غريبة, تحتى يوصل صوتي لمحلات بعيدة..
بأمل أنو لصوتي يكون في شرعية وعلى أمل انو يفهموني الأغلبية.. بس بوقتها بلاقي مجموعة الأقلية بتكرهني
لأني "أنا خاينة"  لأني "أنا مش فلسطينية"!!!
أنا عايشة بدولة تدعي الديمقراطية!! وأنا عم بصرخ بشوارعها "بحاجي للفرص, بحاجة للحرية"..

كبرت وأنا أحاول أكون تابعة لشي ناحي! ما زبطت معي.. لا قدرت ألبس ملابس الفلسطينية!
ولا قبلت تشلحني معالم الإسرائيلية!!
جربت أكون مسالمة بس كيف بقدر اتنكر لنفسي ما أنا من قبل ما يلتقوا جسدي وروحي كنت محاربة!!
كبرت وجربت أكون من المساكين بس ما حسيت تابعة! جربت أكون من المسيطرين وكمان مرة ما حسيت تابعة!!
فكرت امشي بهالعالم بوجهين, فكرت اعيش بهويتين!! فكرت اتنكر وأكون كمان مستسلمة مش اكتر..
وبوقتها اكتشفت إني مثلية.! وتصارعت أنفاسي مع أفكاري وتخبطاتي.. عاصفي  مرقت  براسي وعرضتلي كل شريط حياتي.! رفضت كون من البائسين, رفضت كون من المضطهدين!! وقررت أحب حالي كيف ما أنا.. قررت أحب الناس لو شو ما كانت جنسيتها, لو شو ما كانت ديانتها.. لو شو ما كان لون هويتها!! لا أتوقع منها تكون شي معين ولا أطلب منها تنتمي لشي مجموعة!! مَنِنا بحاجة للتعريفات.. ولا للعناوين ولا للشعارات.. لشو بدنا نكون مقوقعين؟! لشو بدنا نكون بالجورة علقانين!؟! 

اليوم فهمت إني ولا مرة كنت صغيرة.. ولا مرة راح أصير كبيرة. يمكن تجاربي تزيد.! يمكن الوقت يجددلي اكمن فكرة.. ويمكن يمحيلي اكمن ذكرى... بس راح ضلني جريئة.. ما راح اخضع للقواعد ولا راح أوقف عن قول الحقيقة!
آه هويتي زرقة زي ما شعري اسود.. وبكرا إذا بقرر اصبغ شعري احمر بروح وبغير لون هويتي لزهر.! شو بتغير؟! ما شي!! ولا ايا شي؟!! بضلني محاربة.. بضلني عربية.. بضلني نسوية.. بضلني بحب اكتب, بضلني أنا.. أفكاري مشتتة مرات.. وأحلامي غريبة اغلب الأقوات. بخبركو عن أحلامي.. لا بلاها خليها لمرة تاني.. من الأفضل أخبركو انو..
الدولة بالنسبة الي هيي ولا شي.. والحكم ما بيعنيلي شي!! واللون ما راح يحددلي شو هويتي!!
"امرأة, امرأة هو اختياري..! اخترتها هي! إنها السبب في استعماري.. هي الأسطورة من خلف أشعاري.. هي المجرمة, القديسة والبريئة! هي الجميلة والرقيقة! هي الأراضي والبلدان العريقة وهي لي.. هي لي كل الحقيقة! هويتي هي المرأة  القوية.. هويتي هي لغتي بكل حروف الأبجدية.. هويتي هي كل عقبة تخطيتها وكأنها لؤلؤة استخلصتها من حكمة هذه الحياة الأبدية"
                                                                  هويتي هي نحن.. هويتي هي- الصرخة النسوية.

بقلم دي